Huus van de Taol prissenteert naoslagwark veur schrieverij
Streektaolorganisatie Huus van de Taol hef een overzicht veur de spelling van warkwoorden in alle zeuven varianten Drents prissenteerd. Het is vanof nou beschikbaar op de website as naoslagwark veur elkenien die in het Drents schrieven wil.
Als sinds 1987 hef het Drents een officiële spelling, waor ok al ien en aander over warkwoorden verteld wordt, maor een overzicht zoas dit bestund nog niet. Der bint umdebij 175 warkwoorden in zeuven varianten Drents vervoegd. Op dizze manier kunt schrievers gauw en efficiënt de vervoeging van het warkwoord in de juuste spelling achterhalen.
‘Het is een document waorveur wij een koppel vrijwilligers slim dankbaar bint,’ vertelt Arja Olthof. ‘Zij hebt in de leste anderhalf jaor veul wark verzet deur warkwoorden te vervoegen en met taolvaste Drenten tot een oetgebreid overzicht van veul gebroekte warkwoorden te komen.’ De streektaolfunctionaris van het Huus van de Taol hoopt dat het een naoslagwark is dat in beweging blef: ‘Het is het slim belangriek dat de taol vastlegd wordt, maor nóg belangrieker om dit document te laoten gruien met vervoegingen die misschien nog niet in dizze liesten staot. Wie opmarkingen of anvullingen hef kan die ok kwiet via de website.’
Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.
