Is het dommiet, fedusie, mieghummel, kladde of toch prugeltie? Het mooiste Drentse woord van 2020 is bekend! Streektaolorganisatie het Huus van de Taol hef samen met RTV Drenthe ok dit jaor weer naor het mooiste woord oet oeze streektaol zöcht. En dat was veur veul liefhebbers van het Drents reden um een woord in te sturen: umdebij 450 reacties kwamen der binnen tussen 4 en 11 december.
Van alle inzendingen kwamen vief woorden het vaakst binnen: dommiet, kladde, mieghummel, prugeltie en fedusie. Nao een spannende verkiezingsweek met meer as 1000 stemmen leek mieghummel de beste kaorten te hebben. Toch hef het woord prugeltie een eindspurt trökken en is daormet de winnaar van de titel ‘Mooiste Drentse Woord van 2020’.
En dat woord is al vaak te zien in oeze provincie: der bint veul gastolders, dagverblieven en peuterspeulzalen die dizze naam hebt. Niet vrömd, want een prugeltie is een klein (ondeugend) kind.
