An de neie webstee van streektaolorganisatie het Huus van de Taol is nou ok de schrieversdatabank
toevoegd, die goed zien lat hoe umvangriek de Drentse schrieverij is.
Met biografieën van 119 schrievers (en daor kunt er nog wat bijkommen) kunt bezukers van de
webstee een goed beeld kriegen van en veul informatie vinden over de Drentse schrievers.
Redacteur Baukje Bloemert: “Op de olde webstee was dit ok al te vinden, maar die informatie was
stark verolderd. Daorum hew dit jaor alle biografieën verneid”.
In de biografiëen kuj niet allén over het leven en het wark van de schrievers lezen, ok bint er
veurbeelden van heur wark opnommen.
Van Alexander Lodewijk Lesturgeon (1815-1878), Roel Reijntjes (1923-2003) en Marga Kool (1949)
tot bijveurbeeld Delia Bremer (1969), Martijje Lubbers (1979) en Chris Canter (1980).
Wie denkt dat de webstee van het Huus van de Taol nou klaor is, komp bedrogen oet: op dit moment
wordt er hard warkt an een sprekersdatabank, zodat bezukers dommiet ok een Drentstaolige spreker
veur een veurdracht, lezing, trouwceremonie of begrafenis vinden kunt. Drentstaolige sprekers
wordt hier kosteloos op plaotst.
