Commissaris van de Keuning, Jetta Klijnsma krig het eerste exemplaar van ‘Ik trap hum an’. Ze is ‘hartstikke beneid’ naor de verzamelde columns in het boek.
Jaorenlang schreef Martin Koster zien biedrages in de rebriek Sjarlefrans van het Dagblad van het Noorden. Begun dit jaor is de opzet van de krant veraanderd en daormet is Sjarlefrans verdwenen. Veur Koster is het nou tied um zien beste columns oet de krant te bundelen in Ik trap hum an.
In het bijzijn van de partner en de oetgever mag Martin Koster het eerste exemplaar an de commissaris van de Keuning Jetta Klijnsma anbieden. Nao een kop kovvie en een kniepertie is het zo wied. Um het boek zit een rood lint. Daormet is het dudelk: dit is het eerste exemplaar.
Martin Gert Koster (Avereest 1950) schrif al sinds zien jeugd, maor het wordt serieus tiedens zien studententied in Grunnen. Hier studeert hij Nederlands. Saomen met Ton Kolkman richt hij het Drents literair tiedschrift Roet op. Ok is e betrokken bij verscheiden literiare projecten. Zien gedichten bint meer serieus van aard, maor in zien andere wark lat hij vaak op ironische wieze weten hoe hij de dingen zut. Daorbij dielt hij nogal iens links en rechts een sneer oet. Zo ok in de columns die vief jaor lang maondelijks verschenen in de rebriek Sjarlefrans van het Dagblad van het Noorden en waaroet veur Ik trap hum an een selectie maakt is.
Of zoas Koster zeg:
In de afgelopen vief jaor he’k verscheiden pogings edaone wat meer
te vertellen over mien liefde veur de Drèentse taal en literatuur, ik heb verslag edaone van mien wereldreizen hen Ieslaand, Cornwall, Guernsey en Aone, mar -geef acht- ik heb het onderdoems aid ehad over het op en daalgaonde bestaon van een Drentenier, mien eigen levend zeg mar. Een aander he’k ja niet. Mar an alles komp een ende, zoas de gieteling zee tegen de piere.
Ik trap hum an is veur € 10,- te bestellen bij de boekhandel of op huusvandetaol.nl/webshop. Op het YouTube-kanaal van het Huus van de Taol kuj een impressie van de boekpresentatie zien: https://www.youtube.com/watch?v=xFAeI-4To30&t=2s
